WISA NENÊR

04:00 11.04.2015

Wisa nenêre çavwelatê min

Di çavên xwe yên xumamî de

Têkçûyîna qewmekî nîşanî min nede 

Neke ku ez rabim bi cilê ser canê xwe kevim 

Her ku çavên te yên xumamî li min dinêrin 

29 seriyên jêkirî 

Her ku li çavên te yên şil dinerim 

Du çemên har ên ku tîna welatekî naşkênin dibînim 

Wisa nenêre dibêjim 

Wê niha şervanek deng bide ji bin kevirekî 

Dê biqelişîne perdeya xîreta min 

Wisa nenêre 

Ne ku ez ditirsim ji nêrînên te 

Ditirsim xwe tê de bibînim 

Bibînim ku lal, bêhal, bêcîh û war im 

Niha, di vê kêliyê de, 

Gotina dawiya peyvekê me 

Wisa westiyayî wisa li paşmayî, 

Wisa nenêre çavwelatê min 

Kulîlkên çilmisandî nîşanî min nede di wan çavên xwe de, 

Nebêje roj li wan dernayê 

Nebêje dê nebişkivin 

Bigre çavên xwe çavwelatê min 

Bila ji rondikên te yên ku naherikin 

Tijje bibe gola hêviyên min.