Welato!

09:59 17.08.2023

 
Hacî Demîr
Di dergûşa te de zîndanî û dîl im
di ciwaniya sirûşta te de bi çar zara dinalim
di şevên te yên şînê de stêrek melûl im
di erdnîgariya te de bê sitar û mal im
bi çar zara bê ziman û lal im
şepirze derbeder û bê delîl im
ji derdê destûdarê jiyanê bêhal û kal im
Dîl im, dinalim, melûl im, bêhalim, lal im, bê delîl im, kal im...
heya mirinê desta ji te nahêlim
bi çîya, dar û berên te re hogir û heval im
cotyarek xwedî sond û bê emsal im
dê aqar û beyarên te ji dirk û stirîya vemal im
bi parêzim xepar bikim û bikêl im
lawê te welatî'me aza û şîr helal im
li hemberî dijmin û nemerda rim û mertal im
peyrewê Hucam, Egîd, Mamerîş û Rûstemê Zal im.
16.08.2019