Bajarê Amedî de panelêk bi babeta Panoramaya Perîyodîkanê Kurdkî ra Kirmanckî ame viraştene û Mutlu Cano ke çend rojî verê cû kitabê ci yê bi nameyê Bîblîyografîyaya Kirmanckî ame çap kerdene, panel de derheqê rojname, kovare û kitabê ke mabênê serranê 1963 û 2017î de ameyî çap kerdene de melumatê muhîmî dayî.

Nuştox, şaîr, ziwanzan Mihemed Malmîsanij ke eynî wextî de Unîversîteya Artuklu de Serekîya Beşê Kirmanckî keno, nuştox û şaîr J. Îhsan Espar, nuştox Selîm Temo û nuştox Haydar Diljen zî tede xeylê kesê bînî beşdarê panelî bîyî.

Destpêkê panelî de îdarekaranê Weqfa Îsmaîl Beşîkçîyî ra Saîd Verrojî xêrameyîşî meymanan kerd û çarçewaya programê serrane yê weqfe de melumatî dayî. Dima ra Mutlu Canî dest bi qiseykerdişî kerd.

Seke yeno zanayene çend rojî verê kitabê bi nameyê Bîblîyografyaya Kirmanckî (Zazakî) [1963-2017] yê Mutlu Canî amebi çap kerdene. Babeta kitabî eynî wext de tezê masterî yê Mutlu Canî ya û Mutlu Canî no panel de muhtewaya kitabê xo ser o melumatî dayî.

PANEL GOREYÊ 3 SERNUŞTEYAN AME DAYENE

Mutlu Canî destpêkê qiseykerdişê xo de xêrameyîşê beşdarvanan kerd û kesê ke seba Kirmanckî bedel dayî vîr ard. Canî çarçewaya panelî bi hîrê sernuşteyan dîyar kerd û goreyê ci melumatî dayî. Nê hîrê beşî; Dewro ke bi rojnameyê Roja Neweyî dest pêkerdo (1963-197), Dewrê Kovara Tîrêjî (1979-1997) û Dewro ke bi kovara Vateyî dest pêkerdo (1997-2017). Yanî merdim eşkeno vajo panel de ca dîya perîyodîkanê kirmanckî ke mabênê serranê 1963 û 2017î de çap bîyî.

XEYLÊ KOVARE, ROJNAME Û KITABÎ CA GIREWTÎ

Mutlu Canî panel de bi rayîrê sînevîzyonî kovare, rojname û kitabê ke mabênê serranê 1963 û 2017î de ameyî çap kerdene, înan ra yê tewr muhîman bi hawayo dîyayîşkî nîşan da û derheqê muhîmîya înan de qisey kerd.

Panel de sere de ca dîya rojnameyê Roja Neweyî ke metnê sifteyînî yê kirmanckî tede ca girewtî û dima ra rojnameyê Welat, Azadîya Welat, Newepel, kovara Tîrêj, Vate, Şewçila û sewbîna xeylê kovare û rojnameyê bînî zî ca girewtî.

Dayîşê melumatanê Mutlu Canî ra dima, panel bi derheqê muhtewaya panelî de perskerdişê persan û cewabkerdişê persan dewam kerd. Panel bi îmzekerdişê kitaban qedîya.

Çime: Yenî Ozgur Polîtîka