Ji 10 salan zêdetir e gotar, çîrok, helbest, lêkolîn, nirxandin û cur bi cur nûçe di Amîda Kurd de hatine weşandin. Bi hezaran gotarên nivîskarên Amîda Kurd ev qas sal in wekî arşîveke elektronîk li ser lingan dihêle.

Di van 15, heta 10 salên dawî de bi sedan malperên Kurdî hatin girtin. Gelek nivîskaran arşîvên xwe winda kirin. Gelek çûn ser dilovaniya xwe û nivîsên wan jî di webê de winda bûn. Lê Amîda Kurd baweriyek daye nivîskar û xwendevanên xwe ku dê ev arşîv bijî û timî xwe nû bike.

Berî niha 13 salan Amîda Kurd bi scrîpta PHP Nuke weşan dikir. Dûre bi saya hinek dostan bi scrîpta Mambo weşan kir. Kurdîkirina wan scrîptan ne karekî hêsan bû, mala wan ava be, pêk anîn. Piştre demek kurt be jî, bi qasî salekê bi scripta Joomla weşana xwe kir. Joomla jî li Kurdî hate wergerandin.

Ji sala 2011'an û vir ve jî Amîda Kurd di weşangeriya webê ya Kurdan de cara yekem bi scrîpteke taybet (Karger) derket pêşberî xwendevanên xwe. Êdî ne tenê malperek nûçegihanî bû, her wisa jî Blog bû. Bi sedan endamên Amîda Kurd êdî gotar, helbest, çîrok û nivîsên xwe diweşandin. Danegeh her çû mezin bû.

Ji sala 2011'an û vir ve gelek pêdiviyên nû derketin holê. Êdî ji %50 xwendevanan pirtir bi telefon, pad û cîhazên mobîl diketin înternetê. Pêdivî derket holê ku Amîda Kurd xwe li gor van amûran jî nû bike.

Di sala 2016'an de zimanê bernamenûsiya Webê PHP xwe du-sê caran nû kir. Di destpêka 2017'an de êdî pergala me ya kevin dê li ser pêşkereran nexebitiya. Lê pergala me ya nû nîvçe mabû. Digel hemû ceribandinan jî, di dema lêsiwarkirina pêşkêşkeran de îro mehek e zehmetî da me.

Lê di encamê de me têra gelek salan pergaleke nû, hemdem û nûjen derxist holê. Taybetiyên nû hem ji bo qunciknûs, hem ji bo nivîskarên me yên Blogê, hem ji bo xwendevanên me hene.

Em niha bi lez û bez entegrasyona danegeh û pergala nû dikin.

Bi rastî ev dişube veguhartina siwareyeke ku di saetê de 200km diçe.

Bernamenûsê Amîda Kurd R. Tovjîn