Li Ewropayê Platforma Neteweyî Ya Li Dijî Dagirkeriyê bi navê ‘Konferansa Neteweyî Ya Li Dijî Dagirkeriyê’ li dar xistin. Di konferansê de ji bo yekîtî û li hemberî dagirkeriyê peyamên têkoşînê hatin dayîn.

Nûnera Tevgera Jinên Kurd a Ewropayê Besîme Konca bal kişand ser konferansên wisa û got “Mixabin her carê em rûdinên diaxivin û nakevin nav hewlanan. Ev problemek e. Divê em berê vî tiştî zelal bikin. Êdî divê em dev ji axaftinê berdin û gavan biavêjin. Îro dagirker axa me bomberdûman dikin, zarokên me dikujin.”

Parlementerê berê yê HDP’ê Osman Baydemîr jî diyar kir ku li her çar parçeyên Kurdistanê têkoşînek tê dayîn û got “Di van têkoşînan de berdêlên mezin tên dayîn. Hemû partî û îdeolojî ji bo azadiya Kurdistanê amûrek in. Divê em van tiştan baş bi kar bînin. Hemû partî û îdeolojiyan têxin bin xizmeta Kurdistanê. Divê em di navbera partiyan de bibin pir û yekîtiyê ava bikin. Heke em nebin yek, wê dagirker dîsa xwîna me birîjin.”

Parlementerê berê yê YNK’ê yê Iraqê Mûhsîn Osman jî diyar kir ku divê yekîtiya Kurdan di mejî û ruh de hebe û got “Divê em di ruh û mejî de li dijî dagirkeriyê rabin. Di vî warî de gotina Ehmedê Xanî ya ku gotibû ‘Em nebin yek, em ê ji hev belav bibin’ îro hê jî girîng e. Divê em Kurd werin ba hev û xewna Ehmedê Xanî bi cih bînin.”

Hevserokê KCDK-E’yê Yuksel Koç jî diyar kir ku ji bo yekîtiya neteweyî ya Kurdan divê mirov giraniyê bide dîplomasiyê û li hemberî dagirkeran helwesteke zelal were nîşandan.

Nûnerê Asûrî û Siryan George Aryo jî diyar kir ku dagirkeriya dewleta Tirk ne bi tenê li dijî Kurdan e, li dijî gelê Siryan e jî û divê hemû gel li dijî dagirkeriyê rabin.

Di Konferansa Neteweyî Ya Li Dijî Dagirkeriyê de li ser avakirina yekîtiya di navbera Kurdan de, geşkirina diyaloga di navbera partiyan de û berfirehkirina platforma neteweyî ya li dijî dagirkeriyê nîqaş hatin kirin.

Komîteyên dîplomasî, geşkirina têkiliyên di navbera Kurdan û partiyan de, çapemenî û têkiliyê hatin avakirin.

Di Konferansa Neteweyî Ya Li Dijî Dagirkeriyê de gelek biryar hatin stendin. Tê payîn ku biryar roja Duşemê werin eşkerekirin.