Endamê Koordînasyona Civaka Êzidî Hasan Dûtar (Mam Beşîr) 14'ê Kanûnê ji ber krîza dil jiyana xwe ji dest da.

Koordînasyona Civaka Êzidî têkildarî mijarê daxuyaniyek da û diyar kir ku Mam Beşîr îro serê sibehê li Şengalê ji ber krîza dil koça dawî kiriye.

Di daxuyaniyê de wiha hate gotin:

"Dema ku çeteyên DAÎŞ'ê di 3'ê Tebaxa 2014'an de ferman li Şengalê rakir, Mam Beşîr berê xwe da Şengalê û ji bo rêxistinbûn, xwerêveberî û xweparastina Şengalê kedeke mezin da.

Hasan Dûtar yek ji wan şoreşgeran bû ku ji bo xweseriya Şengalê, ji bo naskirina statuya Şengalê bi şev û roj bênavber dixebitî.

37 SALÊN BÊNAVBER Ê TÊKOŞÎNÊ

Hasan Dûtar sala 1956'an li gundê Cinnetiya yê Êlihê li nava malbateke welatparêz ji dayik bû.

Hasan Dûtar ku bavê 6 zarokan bû, mîna gelek malbatên Êzidî yên li Bakurê Kurdistanê ji ber zext û faşîzma dewleta Tirk a dagirker di sala 1970'î de berê xwe da Ewropayê û li Elmanyayê bi cih bû.

Hasan Dûtar ku her tim bi hesreta welat bû, di sala 1983'an de tevî Mam Zekî Şengalî û hin hevrêyên xwe li nava civaka Êzidî dest bi rêxistinbûnê kir ku karibin çanda we ji pişaftinê biparêzin.

Hasan Dûtar ji hingî ve têkoşiya û bi têkoşîna xwe ya 37 salan li derveyî welat di avakirina saziyên Êzidiyan û rêxistinbûna wan de bû xwedî kedeke mezin.

Mam Beşîr li gel zext û zordariya dewleta Elman ku çend caran hate destgîrkirin, dev ji doza xwe berneda û têkoşîna xwe bi biryardarî meşand.

Ji bo pêşîgirtina li fermanan, ji bo pêkanîna tifaqa nava civaka Êzidî li gel karê xwe yê rêxistinî her wiha li qada dîplomasiyê jî bi rol û mîsyoneke taybet rabû.

LI ŞENGALÊ DI KAR Û XIZMETÊ DE BI ROLA PÊŞENGIYÊ RADIBÛ

Mam Beşîr li Şengalê jî ji bo xizmeta ji civaka xwe re bi roleke pêşengiyê rabû.

Di sala 2003'ande di nava damezrandina Tevgera Demokratîk a Êzidiyan (TEVDA) de cih girt.

Mîna Mam Zekî Şengalî, Mam Beşîr jî civaka xwe weke malbata xwe didît, li ser vî esasî kar kir.

Şehadeta Mam Beşîr di vê pêvajoyê de windahiyeke mezin bi xwe re anî. Em ji tevahiya gelê xwe bi taybetî jî civaka Êzidî û malbata wî re sersaxiyê dixwazin.

Şehadeta wî bi xwe re xemgîniyek û dilêşekmezin anî. Bi sekn û biryardariyeke ji wê êşê mezintir soza ku Mam Beşîr dabû Mam Zekî em jî didin Mam Beşîr."