Benî siltan û şirînê 
Xudanê yol û temkînê 
Qumaşê Çîn û Maçînê 
Ji sundûqan deranîne

Qumaş û etles û xara 
'Ebîr û ember û sara 
Muzeyyen bû cemal ara 
Bi toq û tac û zêrîn e

Bi zerrîn toq û xilxalan 
Meşa selwa me ebdalan 
Xuhê avêta alalan 
Şepala taze asmîn e

Ji asmîn û terazim bû 
Bi naz û îşwe mazin bû 
Xirêna toq û bazin bû 
Gohar şor bûn li ser sîne

Gohar û şor e hem dest in 
Sîmadar in venawestin 
Ruhanan şor e lê bestin 
Li govendê çi nesrîn e

Çi nesrîn û qerenfil bû 
Rêhan û nîvenîv gul bû 
Li govendê şil û mil bû 
Lif û rîşî û şetrîn e

Lif û rîşî û şetrî tên 
Bi çîn çîn taze xemrî tên 
Ji baxê taze qumrî tên 
Bi ref ref werdek û sî ne

Bi ref ref werdek û qaz in 
Şerab û şerbet û saz in 
Delal û îşwe û naz in 
Kemançe, ûd û mûxnî ne

Kemançe w ûd mûnîs bû 
Eceb siltanê meclîs bû 
Ji eqlê Batey muflîs bû 
Ji fehm û eql û zanîn e

Melayê Bateyî

(Ji rûpela Memê Miksî)