NESRÎN ORAK -Qezeyî Amedî Licê de Salîha Bulut 18 serr verî ameyî amewa merkeza Amedî. Bulut zaf zilma dewletî vînaya. Bulut ard ziwan ke, 18 ser verocî dewletî çiçî ardo serê înan û çiçî nîyardo, waşt ke hemeyan rojnameya ma Azadiya Welatî ra qise bikera. Û ard ziwan ke keyê înan ra 5 kes leşkeran û qorîcîyan berdê vînî kerdê hetê bînî de zilm û tadeyanê ke ardê înan sero zaf êy.

Bulut, ma dewa Cumarê de cuyayê. Yew roj qorîcîy û leşker eştî dewa ma sero. Mêrdê min Fahrî Bulut, Ramazan û Ekrem Bulut û vistewrê min Alî û Mustafa zî dezayê maya ey, hemê berdê qereqolî. Dima ra zî, dewa ma leşker û qorîcîyan veşnay. Leşkerîy timûtim ameyê dewa ma roje ke amey û ma hemeyan ardî jû ca û vatîy: "Ma şima heman veşnenê."

2 Mengî îşkence kerdêy

Bûlûtî ard ziwan ke dewî de leşkeran zaf îşkence kerdêy û wina domna: "Leşkerîy niştîy herranê ma sero û dorverê ma ra şîyenê û ameyenê. Dewa ma ra, çen kesan girotî binçiman. Dima ra azad kerdîy. Encax Ramazan û Hasan Bulut berdîy Amedî 2 mengan bi înan îşkence kerdîy. Û ey zî azad kerdîy. Nezdîye Licê de perodayiş vejya. Perodayişî de, bi Hasan Bulut, û mêrdeyê mi, Abdulvahap, Yusuf, Raşît, Mehmet, Kamîl, êy hemeyan berdî koyan de kiştîy. Gedeyê hemeyan estbîy. Merhemeta ey leşkeran çînê bi. Dima ra ma zî şîy ey koyan ke, ma ey cenazeyanê bigerê. Ema leşkeran gule eştîy ma sero û neverdeyan ke ma cenazeyan bigerê. Û ma zî rayna zî şîy ey koyan sero û cenazeyanê Sabrî, Raşît û Hasanî ma girotîy. Dima ra ma şîy û cenazeyanê bînan zî ma girot. Humara cenazeyan resa 8 kesan. Cenaze ma ey koyan ra ardî war û ma defin kerdîy."

'Ustegmen emîr day'

'Leşkeran merkeza Licê de ustegmen Mustafa ra emir girotê. Û Çimanê Ekrem, Ramazan Alî Bulutî girê day. 5 kesîy malbata ma ra bîy. Dewa ma ra temamî 8 kes berdîy. Ma vîna. Encax leşkeran neverda ke ma biewnê înan û kera êştî ma. Vatenê mêewnê in hetî. Ey 8 kesan zî berdî koyan kerdî zerê helîkopterî û dewa Pasûrî ra Acanî de, êştî war. Pey ra amey war û 8 cenazeyan sero gule day varnayiş."

'Dewijan hemê çiy vînay'

"Keyayê Pasûrî û dewijîy zî ney bîyayişî vînenê û leşkeran ra vanî şima sekenê, merhemet şima de çîna. Zaten şima ey kesan kişto. Semedê çi ra şima gule reşnenê înan sero. Mîyanê ey êrîşa leşkeran ra 15 serr ravêra ra pey, keyayê Pasûr şîno verê dozgerî û hemê vînayeyanê xo qise keno. Cigerayîş ey heremî de dest pê kerd. Pey ra hesteyanê Ekremî, Ramazanî û Alî yî vînenê û benê tipa edlî û ema hesteyanê ma nêday ma. Faxrî û Mustafa Bulutî ra zî hewna zî xebereke çîno. Ma hema zî xeber negoroto."

'8 kes koyan de kiştiy'

"Dewa ma ra 8 kesîy berdîbîy. Encax hema zî hesteyê Faxrî û Ramazanî nêaysenê. Hikûmat dema vîyarte de bi ma û zaf dewan de zaf zilm kerdîy. Şarê kurdan sero û hewna zî zilm û îşkence dewam keno. Serekwezîr bedilyeno, encax zihnîyeta nêbedilyena. Dema vîyarte de û nika sebîyo, ez zana ke înan merdeyê min zî kiştêy. Semedê çi ra hesteyanê ey kesanê ma nêdanê ma. Dewa ma de zaf kesîy amey kiştene. Encax her wext vanê ke PKK ey kesan kiştêy û heme zûran kenêy ra ke înan ra bawer nêkenê. Çimkî Tirkîya de Edalet çîno."