Li Êlihê operasyona di bin navê "Meclîsa bajêr a KCK"ê de pêk hatî û di encama operasyonê de binçavkirina 40 kesan hat şermezarkirin. Parlementera BDP'ê ya Amedê Nursel Aydogan diyar kir ku operasyon bi navendî pêk tê û navenda wê jî Enqere ye. Aydogan got; "Di vê pêvajoya ku Rojhilata Navîn ji nû ve tê sazûmankirin dê statûya kurdan jî diyar bibe. Ev statû xweseriya demokratîk e. Bila herkes vê yekê baş bizanibe.

Di encama rayeya serdozgeriya komarê ya bi rayeya taybet a Amedê de dozgeriya komarê a Êlihê li 7 bajaran bi awayeke hevdem di çarçoveya operasyona "meclîsa bajêr a KCK'ê de operasyon da destpê kirin. Di çarçoveya vê operasyonê de polîsan li navenda Êlihê berbanga vê şeveqê bi ser gelek mal û navendan de girtin û 40 kes xistin binçavan. Parlementera BDP'ê ya Amedê Nursel Aydogan jî di nav de gelek kesên ku li ber avahiya BDP'ê civiyan bi daxuyaniya çapemeniyê serdegirtin û binçavkirin şermezar kirin. Di daxuyaniyê de dirûşmeyên "Pêkûtî nikarin me biçewisînin" û "Em ê bi berxwedanê biser bikevin" berz kirin. Serokê BDP'a navça navendî ya Êlihê Şukru Kaplan daxuyanî da û got; "Bi binçavkirin û girtinan em ê neçewisin. Têkoşîna me dê bidome. Ji bo em van sedegirtin û binçavkirinan şermezar bikin em ê saet di 10:00'an de dakevin qadan û li ber edliya Êlihê daxuyanî bidin. Lewma em hemû Êlihiyan vedixwînin daxuyaniyê.

Parlementera Amedê Nursel Aydogan jî li hemberî operasyonên demên dawiyê nerazîbûn nîşan da û got; "Ev gel dê xwedî li bedelên xwe derkeve. Bila herkes vê yekê baş bizanibe. Tu kes dê dev ji têkoşîna xwe ya bi salan bernede. Teqez ev gel dê destkeftiyên xwe teslîmî AKP'ê neke."

Aydogan anî ziman ku bi girtina şaredar û endamên meclîsa şaredariyan hewl didin ku şaredariyan ji destê kurdan bigirin û wiha axivî: "AKP dixwaze di Rojhilata Navîn de kurdan bêy statû bihêle. Ji bo vê yekê ketiye nava liv û tevgerê. Lewma li hemberî kurdên birêxistinkirî operasyonan pêk tînin. Statûya kurdan a nû dê bibe xweseriya demokratîk. Bila herkes vê yekê baş bizanibe. Kesên ku dixwazin encamê ji van operasyonan bigirin dê rastî şeqama kurdan bên."

Navên kesên hatine binçavkirin

Navên hind kesên ku di encama serdegirtinên êlihê de hatine binçavkirin wiha ne: Cîgirê Şaredarê Êlihê Serhat Temel, Cîgirê Serokê BDP'a Êlihê Selîm Aratemur, Nûçegihana ajansa me DÎHA'yê ya Êlihê Gulsen Aslan, Cîgirê Serokê BDP'a bajêr Veysî Geyîk, Endama lijneya meclîsa BDP'ê Fatma Demîr, Rêvebirên BDP'a bajêr Ahmet Ozer, Ahmet Îvrendî, endam û rêvebirên BDP'ê Ahmet Aydın, Şerîf Çakar, Ebedîn Satici, Ahmet Çîftçî, Faraç Salman, Suleyman Kaya, Cahît Kaya, Hakîm Sîncar, Zeynel Abîdîn Çelîk, Xebatkara SELÎS'ê Taybet Şenses, Serokê BDP'a Heskifê Ridvan Ayhan, Endamê komîsyona perwerdehiya navendî ê BDP'ê Salih Keleş, Edîtora kovara Heviya Jinê Sultan Şaman, Serokê MEYA-DER'ê Yaşar Kurt, Serokê komeleya oldaran (DAD) Îzzettîn Ege, rêvebirê DAD'ê Ahmet Turelî, Nûnerê Tum-Bel Senê yê Êlihê Muzzafer Çınar û rêvebirê wê Alî Saripinar, Serokê şaxa Genel-Îşa Êlihê yê berê Halîs Yakut, rêvebirên şaxa Egîtîm Sena Êlihê Metin Nas û Onur Kunteş, Endamên Egîtîm Senê Devran Moray û M. Saît Îmret, hûnermendên navenda buharê Adil Aslan û Mahfuz Arslan, Taybet Kizmaz û Hamit Can.

ANF NEWS AGENCY