Ji Karayilan bo hikûmeta Tirk hişyariyek tund!

Serokê Konseya Rêveber a KCK’ê Mûrat Karayilan, ragihand ku şert û mercên dewleta Tirk tune ye ku mudaxeleyê Rojavayê Kurdistanê bike û got; “Lê ger mudaxeleyek pêk bîne, dê Kurdên li her çar parçeyan li hemberî dewleta Tirk şer îlan bikin”. Karayilan banga “amade bin” li ciwanên Kurd ên li bajaran kir û got; “Divê were zanîn ku di rewşeke wiha de hemû Tirkiye û Bakûrê Kurdistanê dê bibe qada şereke dijwar.”

Serokê Konseya Rêveber a KCK’ê Mûrat Karayilan, bersiv da pirsên ANF’ê yên der barê bûyer û pêşketinên li Rojavayê de. Karayilan nerehetiya hikûmeta AKP’ê ya li hember yekitiya Kurdan weke “dijmintiya Kurdan” bi nav kir û hişyariyek tund da dewleta Tirk.

Karayilan, avakirina Desteya Bilind a Kurdan a ji Meclîsa Gel a Demokratîk a Rojavayê Kurdistanê (MGRK) û Encumena Nîştîmanî ya Kurdî li Sûriyeyê (ENKS) weke pêşketinek pir girîng bi nav kir û got; “Ez vê pêngavê weke weke serkeftiyek a siyaseta Kurdan û gelê Kurd dibînin û pîroz dikim.”

EM CUDAHÎ NAXIN NAVBERA TU PARTIYAN

Karayilan got; “Bi ya me, hemû hêzên siyasî, an jî hemû hêzên leşkerî divê beşdarî Desteya Bilind bibin, divê bi vî awayî yekitiyeke xurt a neteweyî were nîşandan. Di serî de PYD, divê tu hêzek tenê ji bo xwe daxwazên cûda neke, bê ku bêjin biçûk an jî mezin, ger her kes li gorî rêjeya hêza xwe beşdar bibe û vê pêkhateyê xurt bike, bi vî awayî dê serkeftina dahatûya gelê me bikeve bin garantiyê. Em weke tevger, bê ku cudahî bixin navbera tu partiyekê, em di çarçoveya yekitiya neteweyî ya demokratîk de bi awayeke wekhev nêzîkî hemû partiyan dibin û piştgirî didin hemû partiyan. Hejmara vê parçeya gelê me kêm e, ji ber wê jî divê ji bo serkeftinê teqez yekitî hebe. Parçebûnên li vir tu xizmetê ji gelê me yê wê derê re nake.”

EV PÊVAJOYA ŞOREŞÊ YE

Karayilan bal kişand bi destxistina rêveberiyên bajarên Rojavayê Kurdistanê jî û bi bîr xist ku gelê Kurd pêşî rêveberiya Kobanê, piştre Efrîn, piştre Amûdê û Dêrka Hemko bi dest xistine û got; “Li vir gotine ‘ Em ê xwe bi xwe bi rê ve bibin’ û pêngaveke pir girîng avêtine. Ev helbet şoreşek e. Di vê pêvajoyê de gelê me ji zext û tundiya sed salan rizgar bû û rêbertiya xwe bi xwe ava kir, gihişt hêza xwe û azadiya xwe.”

GER HER KES DÊ AZAD BIBE, DÊ KURD JÎ WIHA AZAD BIBIN

Karayilan nerazîbûnên hikûmeta Tirk û Serokwezîrê Tirk Recep Tayyîp Erdogan ên li hemberî Rojavayê Kurdistanê weke “bêtehemûlî” bi nav kir û gotinên “Em pêkhatiye di bin kontrola PKK-PYD’yê de qebûl nakin” a Erdogan wiha nirxand; “Ger her kes dê azad bibe, dê Kurd jî wiha azad bibin. Hûn çima ji vê yekê bêzar dibin? Gelo çima Ezaz, Carablus, Mimuc û Bab dikevin destê hêzên muxalîfan, hûn dengê xwe nakin, lê dema Efrîn û Kobanê tên bidestxistin hûn qiyamet radikin? Ka îzaha vê yekê çi ye? Ger li Sûriyeyê pêvajoya şoreşê hebe, helbet gelê Kurd jî dê sûd ji vê şoreşê werbigire. Lê ger bêjin “Nexêr, bila her kes feyde jê bigire, lê bila Kurd kêm bimînin”, ev nêzîkatiya wiha ya ne li gorî herikîna dîrok û demê gelo mirov dikare çawa pênase bike? Tenê tiştek heye; Dijminahiya Kurdan e. Mirov nikare vê yekê bi awayeke din pênase bike.”

KURD DÊ BIRYARA XWE BIDIN

Karayilan bal kişand ser daxuyaniya Erdogan a bi awayê “avakirina Desteya Bilind a Kurdan tiştek şaş e” û got; “Dîsa gotiye ‘Desteya Bilind a Kurdan nunertiya gelê xwe nake’. Ev çawa dibe? Mirov çawa dikare bi ferasteke wiha nêzîk bibe? Tişta ku li Bakûr ji bo BDP’ê dibêje, ji bo PYD’ya ku tu agahiyên wî (Erdogan) der barê wê de tune ne jî dibêje. Li ser vana hemûyan re jî vê yekê ji bo Desteya Bilind a Kurdan a ku ji hemû rêxistin û saziyên Kurdan pêk tê jî dibêje. Ma gelo hûn ê bêjin ka kî nunertiya gelê Kurd dike? Ev yek ne hûn, dê gelê Kurd diyar bike.”

BI KURDAN RE LI HEV BIKIN

Serokê Konseya Rêveber a KCK’ê Mûra Karayilan got; “Gelê Kurd gelê herî esas ê Rojhilata Navîn e. Hûn nikarin bi dijminahiya vî gelî bigihin tu encamê. Çawa ku Yavûz Sûtlan Selîm di vebûna li Rojhilata Navîn de bi Kurdan re li hev kir û bi ser ket, îro jî ger Komara Tirk û hikûmeta wê dixwaze li Rojhilata Navîn bibe xwedî rol û mîsyonekê, ev yek jî enceq bi destjêberdana dijminahiya li hemberî Kurdan mimkun dibe. Hûn nikarin vê yekê bi dijminahiya Kurdan, encex dikarin bi dostaniya Kurdan bikin. “

PÊWÎSTIYA PKK’Ê BI KAMPÊN LI SÛRIYEYÊ TUNE YE

Karayilan, der barê hebûna PKK’ê ya li Rojavayê Kurdistanê de wiha got; “Ev yek aşkere ye, li Kurdistana Sûriyeyê pêvajoya pêş dikeve bi pêşengiya vîna siyasî û gelê Kurd pêk tên. Gotina PKK li wir baregeh daniye, PKK’ê li wir bûye desthilat, evane ne rast in. Jixwe pêwîstiya me bi wê yekê tune ye ku em li tu deverên Sûriyeyê kamp ava bikin. Gerîlayan li herêmên xwe bi xwe bi hezaran kamp hene. Ji ber wê jî tu hêzên PKK’ê li Sûriyeyê tune ne.”

Karayilan wiha domand; “Niha hikûmeta AKP’ê dibêje ‘li wir PKK heye, PKK dijmin e’. Dixwaze di bin navê dijmintiya PKK’ê de dijmintiya Kurdan veşêre. Ev ya yekem. Ya duwem; Gelê Kurd li hemberî PKK’ê xwedî sempatiyeyê ye. Te li hemberî tevgerek ku bi milyonan sempatiyên wê hene, bi aşkereyî dijmintî îlan kiriye. Ev yek jî tê wê wateyê te li hemberî hemû civaka ku ji bo wê tevgerê xwedî sempatiye dijmintî îlan kiriye. Yanî ev yek tê wateya dijmintiya gelê Kurd.”

DEWLETA TIRK LI HEMBERÎ BAŞÛR JÎ HEMAN ZIMAN KAR ANÎBÛ

Karayilan bi bîr xist ku dewleta Tirk berê vî zimanî li hemberî Kurdistana Iraqê jî bi kar anî û got; “Di dawiyê de hûn neçar man ku qebûl bikin. Hûn niha jî li hemberî gelê Sûriyeyê jî heman zimanî bi kar tînin, lê hûn sibê neçar bimînin ku wan jî qebûl bikin. Ji ber ku ev rastiyek e. Ger sibê dusibe li Kurdistana Îranê jî pêşketineke wiha çêbibe, hûn dîsa wiha nêzîk bibin?”

FILISTÎN JI BO EREBAN ÇI BÛ, ROJAVA JÎ JI BO KURDAN EW

Karayılan der barê mudaxeleyek li hemberî Rojavayê Kurdistanê de jî nirxand û got; “Ger Tirkiye mudaxeleyê Rojavayê Kurdistanê ango Kurdistana Sûriyeyê bike, ev yekê tê wê wateyê ku êdî sebra Kurdan nema. Dewletek ku li welatê xwe ewqas siyasetmedarên Kurd digire, li hemberî Rêbertiya Gelê Kurd zêdetirê saleke tecrîd û îşkenceyeke sîstematîk pêk tîne, li hemberî Kurdên Bakûr şerê topyekun îlan kiriye, rabe êrîşê gelê Rojavayê Kurdistanê bike, ev yek jî dibê bibe sedem ku ne tenê Kurdên Rojava, dê Kurdên hemû parçeyan li hemberî Tirkiyeyê şer îlan bikin. Demekê Filistîn ji bo hemû Ereban çi bû, Kurdistana Sûriyeyê ji bo hemû Kurdan ew e. Ji ber vê jî divê rejîma Sûriyeyê jî, muxalîf û dewleta Tirk jî vê yekê baş bibîne: Ger mudaxeleyek li hemberî mafê rewa û xwezayî yên gelê Kurd ên di çarçoveya xwe bi xwe rêveberinê û Sûriyeyek demokratîk de pêk bê, ev yek dê bê wateya dijminahiyê, dê li hemberî vê mudaxeleyê hemû Kurd bi hemû hêza xwe ve şer bikin. Yanî kî êrîş bike, bila bike. Ji ber ku em dibînin hin caran li wê derê hin rêxistin an jî û rejîm li hemberî Kurdan zimandirêjiyê dikin. Lê bila her baş bizane ku gelê Kurd li wê derê ne bê xwedî ye.”

TIRKIYE TEHDÎT Û BLOFAN DIKE

Karayilan bal kişand ser veguhestina leşker û cebilxaneyên ji aliyê dewleta Tirk ve yên li ser sînor tên bicihkirin jî û got; “Dewleta Tirk bi veguhestina hêza xwe ya li ser sînor blof û tehdîdan dike. Dixwaze hêza xwe nîşan bide û zorbetiya xwe nîşan bide. Li aliyekê Wezîrê Derve Ahmet Davûtoglû dişîne Başûrê Kurdistanê û li aliyeke din jî bi tankan li ser sînor Nisêbînê tedbîqatê dike. Ev polîtîkayek ji rêzê ye. Serî li tu hêzeke ciddî nade.

TIRKIYE NIKARE BÊ DYA PÊNGAVA XWE BIAVÊJE

Niha şert û mercên mudaxeleyê tune ye. Dewleta Tirk bê haya DYA’yê tu carî nikare pêngavek jî biavêje. Dixwaze bi vê yekê her kesê bitirsîne, lê bila kesek jê netirse. Ger dewleta Tirk dibêje ew ê gelê me bitirsîne, xwe dixapîne. Gelê Kurd li hemberî dewleta Tirk xwedî amadekariyeke berxwedaneke giştî ye. Gelê me guh nade blofên wiha. Lê divê dîsa ji her dibitiyan re amade be.”

BILA CIWANÊN KURD LI BAJARAN AMADE BIN

Serokê Konseya Rêveber a KCK’ê Karayilan destnîşan kir ku dewleta Tırk dê ji mudaxeleyê zêdetir zextê li hin derdoran bike, û got; “Dê hewl bide ku gelê Kurd li wê derê bitisîne, ji bo gavan ber bi paş ve pê bide avêtin, dê gefan bixwe, yanî bi ya min vê polîtîkaya gef û tehdîdan ji xwe re esas digire. Di pratîkê de dê şert û mercên mudaxelekirinê cûda bin. Ger tiştek wiha bike, ev yek dînîtî ye. Lê ger dînîtiyeke wiha bike, divê hemû Kurd bikevin dewrê. Ez ji niha ve dibêjim; bi taybet ciwanên Kurd ên welatparêz li metropolên Tirkiyeyê û bajarên Bakûrê Kurdistanê li hemberî tişteke wiha hişyar bin û amade bin. Divê were zanîn ku di rewşeke wiha de hemû Tirkiye û Bakûrê Kurdistanê dê bibe qada şereke dijwar.”

Karayilan: Hundir û derveyê sînor êdî bûne çîrok

Behdînan - Serokê Konseya Rêveber a KCK’ê Mûrat Karayilan got; “Niha li 35 km hundirê sînor li derdora Şemizînanê gerîla hene. Bi vî awayî gotinên hundir û dersînor jî êdî dibin çîrok.” Karayılan destnîşan kir ku ev yek ne tenê li Şemîzînanê, niha li Botan-Zagrosê hemû wisa ye û xwest gundên Oremar û Şitazinê bêne valakirin.

Serokê Konseya Rêveber a KCK’ê Mûrat Karayilan ji ANF’ê re axivî û der barê tevgera gerîlayan a ku ji 23’yê tîrmehê ve li navçeya Şemizînan a Colemêrgê berdewam dike de got; “Li hemberî êrîşên ku dewleta Tirk li Kurdistanê pêş xistiye, gerîlayan bi operasyona Şitazin-Oremarê ya di 19’ê hezîranê de qonaxeke nû ya têkoşînê xistiye meriyetê.”

Karayilan got; “Ligel taktîka gerîlayan a lêxe-bireve, niha di rojevê de taktîkek nû ya bi awayê li gelek cihan lêbixe, li wir çeperên xwe deyne û serweriya xwe ya li ser herêmê pêş bixe, di rojevê de ye. Di vê çarçoveyê de niha li Kurdistanê rewşa şerek dijwar heye.”

DI 3 ROJAN DE 2 SKORSKY HATIN XISTIN

Karayilan wiha domand; “ Li ser araziyekê berfireh pevçûneke mezin heye, têkoşîn û şerek heye. Ji ber vê jî dewleta Tirk û çapemeniya Tirk rastiyan ji raya giştî û civakê vedişêre, bi vî awayî bûyerên li Şemizînanê bi awayên cûda şîrove dikin.” Karayilan bi bîr xist ku tenê hefteya borî di nava 3 rojan de gerîlayan 2 helîkopterên skorsky xistine û derbe li 2’yên dijîn xistine.

OREMAR Û ŞITAZIN DI BIN KONTROLA GERÎLAYAN DE NE

Serokê Konseya Rêveber a KCK’ê destnîşan kir ku beşek girîng ji rêya diçe Oremarê di destê gerîlayan de ye û got; “Dîsa, gelo li derdora Çiyayê Cîlo yê ewqas mezin, Çiyayê Çarçela, li derdora Oremarê tu kontrolek a dewleta Tirk heye? Nexêr. Ji ber ku şerek bi rojan bi rêya balefir û kobrayan meşand, lê nekarî bikeve van deran. Gerîlayan li wir rê neda artêşa Tirk û hema bêje herêmên Oremar û Şitazin bi temamî di bin kontrola gerîlayan de ne.”

Karayilan bal kişand ser gundên hatin valakirin jî û got; “Niha dewleta Tirk ji bilî gundên Oremar û Şitazinê, dixwaze hemû gundên herêmên vala bike. Li Geliyê Doskiyan 9-10 gund di bin zextên dijwar ên dewletê de ne û dixwazin vana jî vala bikin. Tenê dixwazin Oremar û Şitazinê bihêlin. Dixwazin sûdê ji her du gundan bigirin û xwe biparêzin”.

BANGA ŞITAZIN-OREMARÊ VALA BIKIN

Karayilan wiha pê de çû; “Bi vî awayî ez dixwazim ji gelê me yê li her du gundan re bêjim; Ez bang li gelê me yê van gundan dikin ku hem ji bo helwestek li dijî polîtîkaya dewleta Tirk a cote standart a ku gunên din ên vala dikin û tenê her du gundan dihêlin û hem jî ji bo dewleta Tirk a mêtînger tu sûd û feyde ji her du gundan negirin, her du gundan vala bikin. Helwesta herî baş a ku gelê me yê li vir nîşan bide ev e.”

REWŞA ŞEMIZÎNANÊ

Mûrat Karayilan destnîşan kir ku niyeta wan a bidestxistina navçeya Şemizînan tune ye û got; “Li wir gerîlayên me li hemberî tûgaya ku her roj topan diavêje gundan û zilmê li gelê me yê li wê herêmê dike, dixwaze çepergirtina xwe ya li herêmê berfireh bike. Yanî tu dê werî li ser sînor gelê me yê li her du aliyên sînor bidî ber topan, wê demê jî gerîla dê were kêleka te. Niha li di nava 35 km ên hundirê sînor de gerîla hene. Bi vî awayî êdî derveyê sînor û hundirê sînor bûye çîrok. Gerîlayan jixwe li deverên nêzî Şemizînanê çeperên xwe danîne. Hemû hewldanên dewleta Tirk ên ji bo gerîlayan ji vir derbixin, hatine pûçkirin. Rewş ev e.”

OPERASYONA LI HEMBERÎ MÊTÎNGERIYÊ

Karayilan got; “Bûyerên niha li wir diqewimin, operasyona gerîlayan a li hemberî zext û zilma mêtîngeriyê ye. Ev sekna gerîlayan performansa leşkerî ya gerîlayan jî nîşan dide” û ev bang kir li gelê Şemizînan-Rûbarokê kir:

“Ez vê jî bêjim: Di encama êrîşên balefirên şer û êrîşên bi obîs û hewanan ên artêşa Tikr de gelê me yê welatparêz yê li vê herêmê gelek ziyanan dibîne. Ez bi salan e ku gelê me yê li vir van tengasiyan dikişîne, lê bila baş were zanîn, ji bo bidawîbûna van êşan û ji bo rawestandina êrîşên dewleta Tirk, tenê rêyek heye ew jî ew e ku gelê me bi yekgirtinê li hemberî hêzên mêtînger û dagirker bibe xwedî helwest. Bi baweriya min gelê me yê li vê herêmê di vê zanebûnê de ye.”

BILA KURD Û ELEWÎ LI HEMBERÎ ÊRÎŞAN PIŞTGIRÎ BIDIN HEV

Karayilan bal kişand ser êrîşên nijadperest û êrîşên lîncê yên hefteya borî li Meletiyê li hemberî Elewiyan pêk hat û got; “ Di bingeha van êrîşan de hawira ku serdestiya Tirk a şovenîst afirandiye û psîkolojiya bindestiyê heye. A girîng ew e ku ev yek were dîtin.” Karayilan ji Kurd û Elewiyan xwestin ku li her derê ku lê ne, li hemberî van êrîşan rêxistinên xwe xurt bkin, di aliyêk têkoşînê de piştgiriya hev bikin.

PEYAMA CEJNA GULAN

Karayilan bal kişand ser pêvajoya 2’ê Tebaxa 1999’yê û destnîşan kir ku Ocalan ji bo pûçkirina êrîşên komploya navneteweyî, ji bo pêşîlêgirtinên pevçûnên di navbera gelên Kurd û Tirk de û ji bo pêşxistina çareseriyeke aşitiyane-demokratîk ji bo pirsgirêka Kurd, pêvajoya 2’ê Tebaxa 1999’ê îlan kiriye.

Karayilan ragihand ku piştî demekê hat dîtin ku êdî tu niyeta çareseriyê ya dewleta Tirk tune ye û got; “Her çendî me heta hezîrana 2004, tenê gulleyk jî neteqand, me weke aliyê Kurd, Rêbertî û tevgera me ji bo pirsgirêkê bi rêyên aşitiyane çareser bibe, me gelek hewl da, lê aliyê Tirkan got ‘Em bi ser ketin, me ew tune kirin’ û hebûna pirsgirêka Kurd înkar kir. Di wê dîrokê de Serokwezîrê Tirk Recep Tayyîp Erdogan li Rûsyayê bersiv da pirsekê û got; “Ger hûn nehizirin, pirsgirêka Kurd jî tune ye.

Belê me ji wê rojê re got Cejna Gulan. Me xwest em gul biavêjin dewleta Tirk, me gul avêt, lê wana li hemberî van gulan gulleyan avêtin me. Gulleya hewanê avêtin, gulleya topê avêtin û xwestin me tune bikin. Bi gulleyê bersiv dan gulê.” Karayilan destnîşan kir ku ji bo AKP dest ji polîtîkayên xwe yên tunekirinê berde, pêvajoya berxwedanê ji 2004 dîsa hatiye rojevê û heta îro berdewam dike.

Karayilan got; “Li ser vî esasî ez bi taybet şehîdên me yên qehreman ên ku di dema vekişîna sala 1999 de şehîd bûn, ên ku bi dirûşima “Hûn nikarin roja me tarî bikin’ bedena xwe dan ber agir û ji bo pûçkirina komployê fedekariyekê mezin nîşan dan û şehîd ketin bi vî awayî destanên berxwedanê afirandin, careke din bi bîr tînim, bejna xwe li ber wana ditewînim û soza ku me daye wan qehremanan, careke din dubare dikim.”

ANF NEWS AGENCY