NORHAN EBDÎ

REQQA – Jinên gundê Xinêz ê Reqqayê ji ber rizgarkirina gundê wan, kêfxweşiya xwe anîn ziman û weke “Vegera li çanda jin” binav kirin.

Piştî ku şervanên Odeya Çalakiyan a Xezeba Firatê gundê Xinêz ê ku 28 Km dikeve rojavayê gundê Qenterî ji çeteyên DAIŞ’ê rizgar kirin, şêniyên herêmê vegeriyan gundê xwe. Lê bi vê vegerê re, tişta herî balkêş ewe ku rengê jin, cil û bergên folklorî yên jin û bişirîn li jinên vî gundî vegeriyan. Ango azadî li rû û sîmayên wan der daye.

Jinên ku berê xwe dan kamereya ajansa me û êşa berê ya çeteyên DAIŞ’ê li ser wan ferz kiribûn, vegotin.

Jina bi navê Emûna Hisên diyar kir ku çeteyan hiştin ku jinên vê herêmê ji her tevgerînek xwe bi guman û tirs bin. Emûnayê got: “Em êdî dixwazin bi xwebûyînê jiyan bikin. Em ê rengê xwe yê rast vegerînin. Em hêvîdar in ku ewlehiya vê herêmê bi tevahî vegere û em jî mîna Minbicê karibin azad bijîn”.

Wedhe Xelef jî ji aliyê xwe ve da zanîn ku dema çeteyan ew bi cil û bergên derveyî persektîfên wan didîtin, yekser hevserên wan digirtin û ceza dikirin. Wedheyê got ku ji ber vê yekê wan nediwêribû ji malên xwe derkevin. Di vê oxirê de Wedhe Xelef pirsa “Ma jiyana jina gundî wiha bû?” kir û bibîr xist ku wan ji zaroktiya xwe ve di nav erdên xwe de çandinî û sewalvanî dikirin.

Ji aliyê xwe ve Eyşe Xelef gelek mînakên çetetiya DAIŞ’ê vegotin û got: “Ew ji îslamê dûr in. dema ku dixwestin bêyî destûra me diketin malên me û bi kirêtiya xwe vedireşiyan. Şukir ji xwedê re em ji wan rizgar bûn. Êdî venagerin jiyana me”.

(ne)

ANHA