BRUKSEL -ANF Hevserokatiya Kongra Gel bi daxuyaniyekê 1. salvegera Şoreşa Rojavayê Kurdistanê pîroz kir û bang li tevahiya gelê Kurd kir ku xwedî li vê deskevtiya netewî derkevin û bi pêş ve bibin.

Hevserokatiya Kongra Gel, bi daxuyaniyekê 1. salvegera Şoreşa Rojavayê Kurdistanê di serî de li Rêber Gelê Kurd Abdullah Ocalan, gelê Rojavayê Kurdistanê û tevahiya gelê Kurd pîroz kir û têkoşerên di rêya azadiyê de jiyana xwe ji dest dan, bi rêzdarî bibîr anî.

Di peyama Hevserokatiya Kongra Gel de hat destnîşankirin ku, Şoreşa Rojavayê Kurdistanê, encama keda 20 salan a Rêberê Gelê Kurd Abdullah Ocalan a li vî beşî û her wiha tekoşîna çil salî ya tevgera azadiyê, berxwedaniya sedan sal a gelê Kurd û jinên azadîxwaz e.

Di daxuyaniyê de hat gotin, "Li ser vî bingehî îro gelê Kurd li Rojavayê Kurdistanê, bi feraseteke azad û demokratîk, xwe birêxistin dike û pergala xwe ava dike. Ji destpêka tekoşîna azadiyê heta roja me ya îro, bi hezaran keç û xortên ji Rojavayê Kurdistanê xwîna xwe ya pîroz xelatî xaka dayikê kirine. Ev bûye bingehek ku bi ronahiya rêya wan şoreşa Rojavayê Kurdistanê bi serkeve û gelê me bibe xwedî statuyek azad û ber bi rêveberiyeke xweser ve biçe."

Hevserokatiya Kongra Gel, di peyama xwe de ev xal destnîşan kir :

"Weke gelekî herî kevnar ê li ser xaka mezopotamyayê gelê Kurd ji despêka dîrokê û heta roja me ya îro li hember desthilatdaran, ji bo xwe berxwedanî her dem kiriye bingehê jiyanê. Ev weke çemeke azadiyê heta roja me ya îro herîkiye û mîraseke pir dewlemend ji bo gelê Kurd afirandiye. Li ser vî mîrasî îro gelê Kurd ketiye pêvajoya ‘’Rizgariya Demokratîk û Avakirina Jiyana Azad’’. Bi bangawaziya dîrokî ya Newroza 2013’an a Rêber APO ve, pêvajoya ku despêkiriye û bi yekemîn salvegera şoreşa Rojavayê Kurdistanê ve, gelê Kurd di qada navnetewî û heremî de bûye navenda çareseriyê û modela demokratîk. Divê gelê Kurd, hemû netew, ol, mezheb û her wiha, tevahî sazî û pêkhateyên azadîxwaz, pergala xwe ya xweser û demokratîk ava bikin. Ev li beranberî tevahî êrîşên ku pêşbikevin jî, wê bibe mertala gelan. Ji ber vê yekê em bang li tevahî hêzên demokratîk ên Surî û heremê dikin ku destek bidin şoreşa Rojava û avakirina Suriyeyek demokratîk.

Careke din di yekemîn salvegera şoreşa Rojavayê Kurdistanê de, berxwedaniya bi rûmet a gelê me yê Efrînê, Serêkaniyê, Tiltemir û seranserê Rojavayê Kurdistanê, em silav û pîroz dikin. Em bi hêvîne ku asta îro li Rojavayê Kurdistanê hatiye gihaştin li ser bingehê tekoşîna demokratîk, ekolojîk û azadiya zayendî, wê ji bo tevahî gelê Kurd, heremê û hemû mirovahiyê re bibe bingehê çareseriya demokratîk û azadiyê. Pêşxistina tekoşîna demokratîk û deskeftiyên şoreşa azadiyê wê bibe bingehê azadiya Rêber APO jî.

Li ser van bingehan em soz didin ku şoreşa Rojavayê Kurdistan destek bikin û erkên ku bikevin li ser milên me, bi bîryardariyeke xurt bi cîh bînîn."