KOBANÊ 05.05.2014 10:23:37 Piştî şer û pevçûnên dijwar û berxwedaniyeke bê hempa ku şervanên YPG'ê di eniya Başûrê Kobanê li hember çeteyên DAIŞ'ê nîşan dan, Girê Sêvê ket bin kontrola YPG'ê û bi dehan çete hatin kuştin û gelek dîl hatin girtin.

Duh di nevbera şervanên YPG/YPJ'ê û çeteyên DAIŞ'ê de li eniya Girê Sêvê yê gundê Sepetê şer û pevçûnên dijwar rûdan. Welatiyên herêma Kobanê bi hemû derfet û îmkanên xwe yên heyî piştgirî dan şervanan.

Li gorî agahiyên ji herêma Kobanê hatin bidestxistin, di encama pevçûnên ku heta derengiya şevê dewam kirin de hêzên YPG'ê careke din dest danîn ser Girê Sêvê û bi dehan çeteyên DAIŞ'ê hatin kuştin û gelek çete jî dîl hatin girtin. Her wiha gelek çek ên wekî Doşka hatin desteserkirin.

Îro di saetên sibê de welatiyên bajarê Kobanê û gundên derdorê bi karwanekî wesayîtan û meşvanan pêşwaziya şervanên YPG'ê û YPJ'ê kirin û bi heyecaneke mezin kêfxweşiya xwe ya ji bo serkeftinên YPG'ê anîn ziman.