TIL TEMIR 02.07.2014 11:13:11 Li Til Temirê, di encama teqîna teqemeniya li kêleka rê hatibû bicihkirin de endamê Meclîsa Gel a Til Temirê Hecî Qasim jiyana xwe ji dest da.

Li gorî nûçeya ANHA'yê teqîn îro ber destê sibê saet di 04.00 de rû da. Hat ragihand ku dema endamê Meclîsa Gel a Til Temir Ebdil Îlah Hecî Qasim ji Hesekê bi wesayîta xwe vedigeriya Til Temirê, 2 kîlometre li başûrê gundê Til Sekra teqîn pêk hat. Di encama teqînê Hecî Qasim jiyana xwe ji dest da.

Hate hînbûn ku teqîn ji ber bombeyek ku ji berê de li ser rê hatiye bicîhkirin, pêk hatiye.

Cenazeyê Qasim anîn Til Temir û wê îro li Goristana Şehîd Rustem Cudî ya li gundê Berkevirê yê Dirbêsiyê bê veşartin.

Ebdil Îlah Hecî Qasim ê 42 salî zewicî û 2 zarokên wî hene. Qasim di heman demê de endamê Desteya Alîkariyê bû.