Di ser komkujiya Roboskiyê re 136 roj derbas bûn. Lê heta niha hêj der barê komkujiyê de tu agahî nehatin ronîkirin. Li aliyê din Fermandarê Tugaya li Bêcuhê Abdullah Paşa bi cerdevanan re civîn pêk anî û got: "Min komkujiya li Roboskiyê pêk anî. Ger ku dîsa li Roboskiyê qaçakvaniyê bikin hewce be es dê dîsa bikujim. Hûn ji bo 50 TL qaçakvaniyê dikin. Lê hûn ji bo 120 TL çekan nagirin." Cerdevanan, diyar kir ku ew dê çekên ku dewletê bi zorê daye wan berdin.

Di 28'ê Kanûn 2011'an de gundiyên ji Bêjuh û Roboskiyê ji bo debara mala xwe bikin derbasî Iraqê bibûn û di dema vegerê de ji aliyê leşkeran ve hatibû sekinandin, piştre jî ji aliyê balafirên şer ên Artêşa Tirk ve hatibûn bombebarankirin. Di encama bombebaranê de 19 jê zarok bi tevahî 34 welatî bi bombeyên artêşê hatibûn qetilkirin. Bûyera ku wekî 'Komkujiya Roboskiyê' hate bi navkirin. Di ser Komkujiya Roboskiyê re 136 roj derbas bûn, lê heta niha tu agahî nehat ronikirin. Li gel vê yekê dîsa Fermandariya Cendirmeyan bang li welatiyan û cerdevanan dike û dixwaze ji nûve rahêlin çekan. Leşkerî ji cerdevanan dixwaze komkujiyê ji bîr bikin û çekan hildin. Duh Nivîskara Radikalê Ezgî Başaran li ser mijarê nivîs nivîsand. Welatiyan ev yek piştrast kir. Welatiyan anîn ziman ku Fermandarê Tugaya Bêcuhê Abdullah Paşa bang li wan kiriye û bi wan re civîn pêk anîye. Gundiyan da zanîn ku Paşa di civinê de gef li wan xwariye û wiha got: "Komkujiyê ji bîr bikin. Ev qeza bû. Dewletê qeza kir. Ser mijarê bigirin. Em bêjin min kir, dê çi bibe? Hûn dikarin çi bikin?"

Paşa: Min kuşt, hewce be ez dê dîsa bikujim

Bavê Huseyin Encu yê di komkujiyê de jiyana xwe ji dest da Îslam Encu, çavdêrî û şahidiya xwe wiha anî ziman: "Hefteya borî Fermandarê Tugaya Bêcuhê Abdullah Paşa bi rêya Sercerdevanê Roboskiyê Mehmet Şerif Encu bang li me kir. Me got em ji vê yekê aciz in û heta ku kujer neyên dîtin em tev li civînê nabin. Piştî min ev ji Sercerdevan Mehmet Şerîf Encu re got Fermandarê Bêcuhê Abdullah Paşa, ji ber ku cerdevan neçûne peyvirê xwest bi wan re civînê pêk bîne. Pişt re dîsa bang li me kir û em vexwandin civînê ya li Germandariya Tugaya Bêcuhê. Di civînê de ji mere got 'An hûn dê biçin peyvirê, an jî ez dê we ji peyvirê bigirim.' Me jî got em naçin peyvirê û em amadene ku dest ji çekan berdin. Min got heta kujer neyên dîtin û darizandin em naçin tu deran. Li ser vê yekê bersîv da me û got 'Min 34 kesên li Roboskiyê kuşt. Li Roboskiyê kî qaçakvaniyê bike ez dê dîsa bikujim.' Me jî got wisa bidome em dernakevin operasyonan."

'Em dê çekên wan berdin'

Encu, bal kişand ser girtinên piştî komkujiê jî û wiha axivî: "Li aliyekî zarokên me tên kuştin, li aliyê din ji ber em bertekê nîşanî qeymeqam didin em tên girtin. Li ser berteka li dijî qeymeqam lîsteya 74 kesan derxistin û binçavkirin. Di ser komkujiya 34 kesan re 5 meh derbas bûn, lê hêj hesap nehatiye pirsîn. Heta ku bûyer ronî nebe û hesap nepirsin em cerdevaniyê nakin. em dê çekên cerdevaniyê berdin. Di salên 1992'an de bi zorê çek dabûn me. Pişti vê komkujiyê em dê çekan berdin."

Bavê Cemal Encu yê di komkujiyê de jiyana xwe ji dest da Suleyman Encu, jî anî ziman ku ew li gel 6 kesan çûn cem Fermandar Paşa û wiha axivî: "Fermandar pirsa 'Hûn çima neçûn peyvirê? Ev qeza bû ji bîr bikin.' Me jî got ev ne qeza bû û em dê bûyerê bişopînin. Fermandar jî got 'ferz bikin min kuşt. Em dewlet in. Hûn dê çi bikin? Hûn ji bo 50 Tl qaçakvaniye dikin. Lê hûn 120 TL nagirin û nabin cerdevan.

'Em navê fermandarê fermana kuştinê da dixwazin'

Bavê Şerafettin Encu Nazmi Encu jî ji Paşa re got ew navê fermandarê fermana lêdan û kuştinê daye dixwazin û wiha got: "Kurê bin bi bombeyên balafirên şer hate perçekirin û hêj buyer ronî nebûye. Ez dê çawa warastim. Ji ber vê yekê ez naxwazim biçim peyvirê û dixwazim çekê dewletê dînim.

Bavê Selam Encu Ahmet Encu jî bang li rayedaran û parazvanên mafên mirovan kir û ji bo bûyer bê ronîkirin alikari xwest.

(mae)