29 Gulan

OMER ÎKE

AMED (DÎHA) - Meclîsa 40'an ya navça Sûra Amedê bi piştgiriya Kongreya Civaka Demokratîk li Vatîkanê bi Papa Franchesco re hevdîtin kir. Şaredarê berê yê Sûrê Abdullah Demîrbaş, Parêzer Mihemed Dara Akar û Şêx Nekşî Bukarkî têkildarî hevdîtina li gel Papa Franchesco re nirxandin û dan zanîn ku Papa piştgiriyê dide pêvajoya diyalogê û anî ziman ku slavên xwe yên taybet ji amediyan re rêkiriye.

Ji Meclîsa 40'an ku ji oldar û nûnerên nijadên wekî ermenî, sûryanî, kildanî, dûmanî, tirkmen û kurdan pêktê heyetek di 26'ê gulanê de li Vatîkanê bi bi Rêberê Xirîstiyanên Katolîk Papa Franchesco re hate ba hev. Heyeta ji Şaredarê berê yê Sûrê Abdullah Demîrbaş, Parêzer Mihemed Dara Akar û Şêx Nekşî Bakûrkî pêk dihat têkildarî serdana xwe ya bi Papa Franchesco de hin agahî dan.

Papa: Xwedê bi we re be, Ez hêvî dikim ku hun bi serkevin

Şaredarê berê yê Sûrê Abdullah Demîrbaş diyar kir ku ew ji bo meclîsa 40'an bidin nasandin û piştgiriya Papa ji bo pêvajoya diyalogê werbigirin çûn serdanê. Demîrbaş anî ziman ku Papa ji bo pêvajoya diyalogê piştgiriya xwe anîye ziman û gotiye : "Xwedê bi we re be, Ez hêvî dikim ku hun bi serkevin."

Sersaxiya ji bo malbatên Somayê

Demîrbaş da zanîn ku wan li ser rewşa Rojhilata navîn û pirsgirêka kurd nameya ji 2 rûpelan pêk hat radestî Papa kirine û got: "Papa pirsgirêkên rojhilata navîn û Tirkiye ji nêz ve dişopîne. Komkujiya Somayê bi tûndî rexne kir, ji malbatên Somayê re sersaxî xwest û bi taybet slavên xwe ji amediyan rêkir."

Biraziyê Şêx Seîd, Parêzer Mihemed Dara Akar jî derbarê serdanê de axivî û wiha got: “Projeyên Meclîsa 40’an projeya Aştî û Demokrasiyê ye”. Dara Akar da zanîn ku cara yekemîne ku heyetek ji Kurdistanê serdana Vatîkanê dike ev tiştek pir giringe û ev tişt gotin: "Dema ku em temaşeyî Rojhilata navîn bikin ku binavê ol û baweriyên pîroz şereke qirêj didin meşandin û baweriyan weke bergal bikartinin."

Li ser 5 mijaran nîqaş

Endamê Meclîsa 40'an Şê Nekşî Bakûrkî ku tevli hevdîtinê bûye anî ziman ku wekî Meclîsa 40’an liser 5 xalan bi papa Franchesco re hevdin pêk anîne û ev agahî dan: "Me li ser xalên wekî Pêvajoya ku ji aliyê Rêberê PKK’ê Abdullah Ocalan û hîkûmeta Tirk ve hatiye avêtin, projeya din ya ku li qada hunerê Dêr û Mizgeft û mala Êzîdiyan werin çêkirin. Projeya sêyem jî bircên Amedê ji bikeve lîsta UNESCO'yê, projeya çarem ya herî girin jî me papa vexwend Amedê. Me êrîşên li dijî kesên ne musluman yên li Rojhilata Navîn jî bi zimanek tund şermazer kir."

'Wekî pisîkan diçûn, wekî pisîkan dihatin'

Parêzer Akar derbarê meclîsa 40’î de ji wiha axivî: "Di mîtolojiyê de li Amedê meclîsa 40’an hebû. Ev navê 40’an di nava ol û baweriyên weke ola îslamê, ola xiristiyan, Elewiyan û Êzidiyan de cudahiyek taybet heye. Lê belê bingeha vî navî li Amedê 40 kes hebûn li hev kom dibûn û pirsgirêkên ku dinav bajar de derdiketin ji bo binirxînin û çareser bikin bi şeklê pisîkan derdiketin ji derveyî bajar û pirsgirêk dinirxandin û disan bi şiklê pisîkan diketin nava bajar. Parêzer Akar diyar kir ku di sala 2012’an de dibin sêwana Şaredariya Sûrê û piştgiriya KCD’ê meclîsa 40’an hat ava kirin.

(oî/lg)