ERDOGAN ALTAN Mamosteyê zimanê kurdî û di heman demê de Muşavirê Malî ango jimêryariyê dike Hasip Yalniç, piştî pirtûkên ji bo zarokan ên bi navê "Lîstikên Zarokan", "Kêzxatûn" niha jî ji bo jimêryaran pirtûka bi navê "Jimêryariya Giştî" ji Enstituya Kurdî ya Amedê derket.

Li hemberî gotina Cigirê Serokwezîr Bulent Arinç a "Zimanê kurdî ne zimanê şaristaniyê ye" û her wiha di hemû daxûyanî û daxwazên partî, rêxistin û saziyên sivîl ên kurdan, "Ji bo pêşketina zimanê kurdî divê bibe zimanê bazirganiyê" pirtûka ku ji hêla Enstituya Kurdî ya Amedê ve bi navê "Jimêryariya Giştî" hate çapkirin wek bersivek e. Mamosteyê zimanê kurdî û heman demî de Muşavirê Malî ango Jimêryariyê dike Hasip Yalniç, piştî pirtûkên ji bo zarokan ên bi navê "Lîstikên Zarokan", "Kêzxatûn" niha jî ji bo jimêriyaran pirtûka bi navê "Jimêryariya Giştî" ji Enstituya Kurdî ya Amedê derxist. Di pirtûka ku xwerû bi kurdî ye, peyvên di bazirganiyê de ji berê ve hatine bikaranîn û gelek peyv jî li gor jimêryariyê hatine sazkirin, cih digirin. Yalniç, diyar kir ku ew carinan derdikevin qadan û daxwaza perwerdehiya zimanê kurdî dikin. Yalniç, da zanîn ku an ew ji gotinên xwe bawer nakin an jî di pratîkê de qels dimînin. Yalniç, destnîşan kir ku ew jî di vê mijarî de li xwe vegeriya û ev pirtûk amade kir. Yalniç, anî ziman ku hêj ew di nava van fikran de bû pirtûka matematîkê ya bi kurdî hatiye amade kirin. Yalniç, wiha got: "Dema min pirtûka matematîkê ya ji hêla Hasan Guneylî ve hatî amadekirin, dît min got 'demek tê nivisandin. Min got madem cara yekemîn e pirtûka jimêrmariyê tê amadekirin, divê ne werger be. Min ji bo peyvekê, her carê deh pazdeh kesan re axivîm, tiştên digotin min dinivisand, datanî ber hev û li gor wê peyveke amade dikir." Yalniç, diyar kir ku edîtorê pirtûkê jî Ferhat Dengizî bû ye û nêzî 2 mehan pê re xebitî ne. Yalniç, da zanîn ku ji bo zimaneke standart bigirin ew pir baldar dixebitîn û wiha got: "Ji ber ku zimanê kurdî pir berfireh e, me di her wateyî de ji nav hev dineqand, gelo kîjan peyv pir kurdewariye, em li ser disekinîn."

'Dê her kes her awayî karibe jê sûd werbigire'

Yalniç, da zanîn ku ew vê pirtûkî ji bo kurdan a di pêşerojê de di dibistana amadayî û zanîngehê de beşa jimêryariyê bixwîne, her wiha jimêryarên heremê yên kurd dê karibin jê sûd werbigirin. Yalniç, destnîşan kir ku ev pirtûk ji bo jimêryariya di dibistanên kurdên başûr, bakûr û rojavayê de karibin weke ders bê dayîn.

'Ev pirtûk destpêk e'

Yalniç, diyar kir ku ew di dibistana amadehiyê û zanîngehê de beşa jimêryariyê xwendiye. Yalniç, destnîşan kir ku jimêryarî mijareke ne tenê bi pirtûkekê bê fêm kirin e, divê gelek xebat li ser bên kirin. Yalniç, wiha got: "Ji bo vê yekê jî divê gelek pirtûk bên amadekirin, lê ev pirtûk hêj destpêk e."

'Pirtûk gelek bertekên erênî girt'

Yalniç, anî ziman ku ji bo naskirina jimêryariyê destpêkê qala dîroka jimêryariyê kiriye. Yalniç, ev tişt gotin: "Jimêryarî ji ku tê, çawa derketiye, ji bo çi derketiye? Min qala wan kiriye. Pişt re jî qala wateya wê kiriye. Bi van yekan re jî hêdî hêdî pergala jimêryarî çawa saz dibe, çêkiriye." Yalniç, destnîşan kir ku kesên pirtûkê xwendine bertekên xweş nîşandane û wiha got: "Min bertekên erênî yên ku mirovan kêfxweş dike girt. Ji ber kesên dixwendin digotin 'keseke ji jimêryariyê fêm neke jî dema bixwîne dê fam bike."

(ea/ab)