NAVENDA NÛÇEYAN - ANF Li ser têkiliya navbera AKP/Qesr û çeteyên DAIŞ'ê, her roj agahiyên nû derdikevin holê.

Çeteyên DAIŞ'ê yên li Kurdistan û Tirkiyeyê gelek komkujiyên hovane kirine, tevî ku di nava xwe de bi zimanê Erebî daxivin jî, derket holê ku Rêxistina Îstîxbarata Milî ya Tirk (MÎT), bi zanebûn li axaftina bi telefonê ya bi zimanê Erebî guhdarî nekiriye.

Personelê bi navê M.Y. ê li servîsa guhdarîkirina li telefonan a li Serokatiya Herêma Enqereyê ya MÎT'ê dixebite, der barê mijarê de nameyek ji Şêwirmendê MÎT'ê Hakan Fîdan û rojnameya Cûmhûriyetê re şand.

'AXAFTINA BI EREBÎ HÊJAYÎ ÎSTÎXBARATÊ NAYÊ DÎTIN'

Vî personelî rewşa li Şaxê 3. a Serokatiya Herêma Enqereyê, bi vî rengî vegot:

"Milîtanên DAIŞ'ê yên berpiryariya êrîşa xwekujî ya li Pirsûsê û Gara Enqereyê girte ser xwe, tê zanîn di nava xwe de bi zimanê Erebî daxivin. Lewma girîngiya vî zimanî ne kêm e. Lê belê hema hema temamiya monîtorên Erebê yên şaxa me (Kesê bi navê A.U. ê li telefonan guhdarî dike) bi bikaranîna têkiliya nêz a bi rêveberiyê re, axaftinên bi vî zimanî di çarçoveya 'Ne hêja ye îstîxbaratê' dinirxîne û çavên xwe li vê rewşê digire. Di rojên ewçend hesas e, bi tirs û fikar im ku bi hezaran axaftinên bi zimanê Erebî di çarçoveya 'hêjayî îstîxbaratê nîne' hatine nirxandin."

M.Y. diyar kir, ji ber ku wî şaşîtiyên heyî yê li beşa lê dixebite vegotiye, cihê karê wî hatiye guhertin, ji lojman hatiye derxistin, amîrên wî lê guhdarî nekirine û ji meha Çileyê û vir ve tevî ku xwestiye jî, mufetîş nehatiye şandin.