Yekîneyên Parastina Gel (YPG) piraniya bajarokê Rimêlan ê Girkê Legê ji bermahiyên rêjîma Sûriyeyê vala kir û piraniya saziyên hukmetê xist bin kontrola xwe. Bi vî awayî bajarok ji rejîma Baas hate rizgarkirin..

Îro saet di 03.00'an de Yekîneyên Parastina Gel(YPG) riyên ketin û derketina bajarokê Rimêlan girtin, û ketin navenda bajêr. YPG'ê piraniya saziyên bajêr kirin bin kontrola xwe û niha navenda ewlekariyaleşkerî , ewlekariya siyasî û tabûra Hecana ji aliyê YPG'ê ve hatine dorpêçkirin..

Navendên ku YPG'ê bi dest xistine ev in: Qereqola Polîsan, navenda Partiya Baas, navenda ciwanên Partiya Bass û hemû saziyên xizmetan ên bajêr. Her wiha YPG'ê hine çekên leşkerên rêjîma Sûriyeyê desteser kirin.

Herî dawî, YPG’ê bi hevkariya gel bajaroka Çilaxa ya girêdayî Girkê Legê ku 45 kîlometrî rojhilatî li Qamişloyê ye, li ser riya Girkê Legê û Qamişlo ye azad kiribû.

Şervanên YPG’ê di 9’ê Çileyê de dest bi dorpêçkirina Tabura Leşkerî ya Gir zîro ya li Girkê Legê kiribûn. Di vê dorpêçkirinê de ji 5 aliyan şer rûda û bû sedama kuştin û birîndariya hin leşkerên rejîma Sûriyeyê. Piştî dorpêça 11 rojan berdewam kir, Fermandariya Biryargeha Navendî ya YPG'ê aşkere kir ku herêma Gir Zîro bi temamî ketiye bin kontrola wan.

ŞOREŞA 19’Ê TÎRMEHÊ

Kurdan li aliyekê li dijî êrîşan liberxwe dan û neketin nava şerê qirêj, li aliyê din jî pêdiviyên siyaseta xwe ya serbixwe bicîh anîn. Di vê çarçoveyê de di 19’ê Tîrmeha 2012’an de pêvajoya şoreşê ku paşerojek wê ya dehan salan heye, pêngavek din pêşve bir û rêveberiyên bajaran girtin destê xwe. Roja 19’ê Tîrmehê li bajarê Kobanê gel hêzên rejîmê ji bajêr derxistin, piştî Kobanê li Efrîn, Serêkaniyê, Dirbêsiyê, Amudê, Dêrik, Girkê Legê, Tirbespiyê, Tiltemir rêveberiyên bajaran hatin bidestxistin. Her wiha li bajarên Sûriyeyê yên wekî Heleb, Rakka û Hesekê jî li taxên ku piranî kurd lê dijîn, hêzên rejîmê hatin derxistin. Li bajarê herî mezin ê Rojavayê Kurdistanê Qamişlo hêzên rejîmê hîn nehatine derxistin, lê ji bilî avahiyê fermî yên rejîmê, hemû bajar di destê gel de ye.

YEKÎNEYÊN PARASTINA GEL

Bi destxistina rêveberiyên bajaran re kurdan xeta parastinê jî xurt kir. Di vê çarçoveyê de Yekîneyên Parastina Gel (YPG) ku di 2004’an de dest bi xebatên wê hatibû kirin û di sala 2011’an de bi awayekî fermî hatibû îlankirin, lez da xebatên birêxistinkirinê. Li tevahiya sînorên Rojavayê Kurdistanê yekîneyên YPG’ê hatin bicîhkirin û li dijî êrîşan jî destkeftiyên herêmê parastin.