OSLO ANF Zuhat Kobanê yê tevlî semînereke ku li Oslo hat organîzekirin bû, li vir rewşa dawî ya Kobanê û bi taybet hevdîtînên PYD’ê yên bi DYA û dewletên Ewropa re nirxand.

Nûnerê Ewropa yê PYD’ê Zuhat Kobanê, diyar kir bi taybet li Rojava ji bo Kurdan pêvajoyeke nû hatiye destpêkirin, YPG yekane hêza li hember çeteyên DAIŞ têdikoşe, DYA û dewletên Ewropî ev rastî fêm kirine. Kobanê ragihand ku êdî hevdîtinên wan ên bi DYA û hêzên din re ne veşartîne û ev nîşan dide ku Kurd êdî li Rojhilata Navîn aktor in.

Kobanê got ku Fransa û hin dewletên Ewropî jî dixwazin alîkariya leşkerî bikin, lê heta niha tu alîkariyeke çekan wernegirtine. Zuhat Kobanê, anî ziman ku her çiqasî di çend rojên dawî de darbe li çeteyan hatibe xistin jî hê rîsk dewam dike û Kurdên li Ewropa bi çalakî û alîkariyên xwe yên maddî hêz û moral dane. Kobanê di dewama axaftina xwe de got ku pêwîst e desteka maddî û manewî dewam bike.

Di aktîvîteya li semta Holmlia ya Oslo pêk hat, Kurdên ji çar parçeyên Kurdistan ên alîgirên partiyên siyasî yên Kurd beşdar bûn. Semîner bi beşa duyemîn a pirs-bersivan dewam kir. Civîna 17:30 destpê kir nêzî 3 saetan dewam kir.