ŞEVA YELDA (21ê meha 12an)
Şeva Çile pêşwaziya ronahiyê û şahiya şikestina tariyê ye
YELDA dirêjtirîn şeva salê ye (Şeva Çile). Li rojhelatê welatê me vê şevê ceşin digirin. Lewra ev şev, şeva serketina ronahîyê li ser tarîtîyê û serketina germayê li ser sermayê ye. Şeva ji dayîkbûna ronahî û germa û tavê ye. Li şeva Yelda da xizm û kes û dost û heval li dor hev berhev dibin û bi xweşî û dilşayî, bi deng û awaz ewê şevê pîroz dikin. Her kes maseyên xwe bi mêwe û çerezên rengareng dixemilînin. Lê di nav wan mêwe û çerezan da hebûna hinar û şivitîyan mercê serekî ye.
Şeva Çile pêşwaziya ronahiyê û şahiya şikestina tariyê ye. Lewra ji wê rojê û bi şûn ve êdî şev her ku diçe kintir û roj dirêjtir dibin. Mîtra bi zêdebûna ronahiyê re bihêztir dibe.
24ê mehê jî Noel´a cîhana xirîstiyan e. Weke rojbûna Îsa pîroz dikin, lê ev dikare weke gelek tiştên din bi bûyereke olî ve hatibe pînekirin. Lewra di pîrozbahiyên Noel´ê de jî “ronahî” pir tê bikaranîn. Hemû mal û xanî bi ronahiyên curbecur têne xemilandin û ew jî şahiya kinbûna şevê dikin.
Eve jî çend bend ji helbesta AX Şilêrokê li ser şeva Yeldayê.
Ev şadî ji ola Mîtrayê tê. Rojî û cejna êzdîya jî bi wê bûyarê ve girêdayî ne.
Bala xwe bidênê Kurdîno, ew tava li ser ALA RENGÎN ne ji acizî li wir cîh digire. Ji tarîxek bê hesap, ji bawerîyêk ne seqet jî Kiltûrek pir dewlemend tê. Wûn çi wext bixwazin li dîroka kurda bipirsin herdem wunê pêrgî serbola tavê bibin. Bê dewlet jîyan nabe…. Dem baş
Ax Şilêrok şeva Yelda dîsan hat
Tu dê dîsan şahê şevê bikî mat
Dîsan tu dê tavê hil kî ji rojhelat
Dê bişkêtin tarîtî, sirr û serma
Ser bikevît evîn û tav û germa
Şilêrokê ez her xema te da me
Bîst sal in ku ez li dûrî te mame
Ne xema xwe, xema gelê xwe da me
Bêje kanê rewşa yaran çawa ye
Gelo dîsan komên wana ava ye?
Dîsan dixon şivtî û wan hinaran?
Tev rûdinên koma wan dost û yaran
Dîsan dengbêj didin gazî û hawaran
Yan dengê wan di gewrîyê da fetisî
Dîsa dimrin bo letek nanê tirsî ?
Kanê dîsan hewa sar û bi xûs e
Dilerizin zarrên sêvê û rûs e
Çavê guran tarîyê da diçirûse
Tirs û tarî, sirr û serma her heye
Merg û mirin dîsan her para me ye?
Yan şîyar e xewar ji xew radibin
Bi dîtina tavê ewan şa dibin
Li dor kuçikekê bi hevra dibin
Hîvîdar im ku dê geş be tava we
Êdî çi car şêlû nebe ava we
Şêlêrokê dîsan dê hilbêtin tav
Dost û heval dê bidin hevdu silav
Kanîyê bizên ji her alî derbê av
Dê bişkêtin kuşre, qeşa, zemzelîlk
Ser hilîne şilêr, sorgul û kulîlk
Silav li we li kom û kozên we be
Tifaq û yekbûna we bila hebe
Bextê we me bêtifaqî ba nebe
Gelo yek bin, bi yek dev û yek destî
Nemînin jêr destê her pîs û pestî
Çavkanî: Perwîz Cîhanî