Hişyar bin – provokat’sîon e!

Ezîz ê Cewo

Wek ku tê zanîn, piştî êrîşên DAÎŞ-ê yên li ser Şengalê û Kobanê hêzên siyasî yên k’urdistanî gavên berbi bi yekîtî dijî wan êrîşan bisekinin, avîtin. K’omên YPG-ê di Şengalê da li dijî DAÎŞ-îyan k’etine şer’ekî berxwedanî, wisa jî k’omên pêşmergayan çûne Kobanê... Û di dilê gelê k’urd da pirîskên hêvîyekê hatin xuyan, ku eva yeka dikare bibe bingeha avakirina Yekîtîya Net’ewî.  

Û ji bo avabûna vê Yekîtîyê, dive ev hevk’arî bi xurtî bê domandin!…

Lê, wek ku tê xyanê, ev yek ne bi dilê hinek hêzan e, bi t’aybet jî, ne bi dilê hêzên dagerker û hinek hêzên k’urdistanî ye, yên ku bi wan va girêdayî ne. Di vî warî da  K’omara T’irkîyayê serk’êşîyê dike…    

Ji bo ku hêzên k’urdistanî nebin yek, hêzên derva her r’êbezeke k’irêt, fitne, derew,  şer’ û şilt’axan  bik’ar tînin, ku dutîretîyê bikin nava wan. Ji bo vê, çi ku ji destê wan tê, dikin, hemû p’ergal û derfetên xwe dikine k’ar.

Û hema ku di warê yekîtîya k’urdan da birûsîya helwesta erênî tê xuyan, ev mak’îneya belavkirina agahîyên fitneyî û derewan dik’eve kar, û her tişt tê kirin, ku ji yekîtîya k’urdan r’a astengîyan çêbikin…   

Li vira jî “RUDAW” r’ola sereke dilîze. Û di vî warî da li ser r’êze weşanên wê yên berê da yek jî zêde bû, ya ku di r’êza provokat’sîonên wê da cîhê xwe yê t’aybet digire.

Ev provokat’sîona vê dawîyê, wek ku tê xuyanê, di navendên t’aybet da hatye amadekirin – bi prênsîpa: “Derewa ku sed carî bê dubarekirin, wê li şûna r’astîyekê bê  p’ejirandin!”

Fermo, bixwînin û matma nebin:

Dihok (Rûdaw)- Piştî dagirkirina bajarê Şingalê ji aliyê rêxistina DAIŞê ve, hêzek ji gerîlayên Partiya Karkerên Kurdistanê (PKK) û şervanên Yekîneyên Parastina Gel (YPG) berê xwe dan çiyayê Şingalê. Serkirdeyekî wan li wê deverê jî dibêje ku, mebesta wan ji Şingalê avakirina kantona wê deverê ye û piştî avakirina “Kantona Şingalê” dixwazin li Qendîl û Silêmaniyê jî kantonan ava bikin...

http://rudaw.net/kurmanci/kurdistan/0501201510

Mirov ji tiştê weha ra çi bibêje?...

Û ev nû nîne, wek ku tê zanîn, li ser pirsa Şengalê demekê berê jî agahîyên ne r’ast hatibûn belavkirin, xwedêgiravî, PKK û PYD dixwazin, şengalê ji Herêma Başûrê K’urdistanê biqetînin. Li dijî van agahîyên ne r’ast endamê Konseya Birêvebir a K’oma Civakên K’urdistanê (KCK)ê bir’êz Murad Karayilan daxuyand, ku “Şengal herêmek û  bajarekî K’urdistana Başûr e, û eva misoger e û nabe kesek li ser vê nîqaş bike”. 

 …Ewî wisa jî zelal erênîya vê demê derxiste pêş. Ew jî ew e, ku  “…mijara niha ya sereke azadkirina  Şengalê ye, ku divê em hewl bidin Şengalê azad bikin û divê hemû hêzên K’urdistanî beşdarî vê hemleyê bibin û bi hevra Şengalê r’izgar bikin. Daku xelkê  me yê Şengalê cardin veger’in”.

Lê, ji bilî vê, bir’êz Karayilan nêr’îna PKK-ê aşkere kirye:  “…divê Şengal sîstemeke xwe ya xweser û t’aybet hebe. Ango gelê me yê êzîdî li wir bi xwe bikaribe xwe bir’êve bibe û bi xwe bikaribe xwe bip’arêze û em hemû hêzên K’urdistanî jî piştevanîya wan bikin. Di hundirê sîstema federasyona Herêma K’urdistanê de weku herêmek xweser dive ku Şengal jî cihê xwe bigre”.   

http://www.xendan.org/kurdi/dreja.aspx?=hewal&jmara=4198&Jor=1

Helbet, eger di dilê mirov da helwesta xirab nîn be, mirovê vê r’ast têbigihîje, ji ber ku li vir her tişt r’ast û vekirî hatye gotin, Balk’êş e, li vira çi ne bi dilê biraderan e? Çi ye, gelo ev daxweza mirovî nine? Çima em – k’urd dixwazin di nav sîstêma Îraqê da xwedî mafên xwe yên t’aybet bin, lê k’urdên êzdî di nav sînorên Herêma Başûrê K’urdistana Fêdêral da nikarin xwedî mafên xwe yên mirovî bin? Çima dive ew bi xwe xwe bir’êva nebin, bi xwe xwe nep’arêzin? Hinek ji vê ne r’azî ne? Çima dive bê merc û peyman “xwedîkî” wan hebe, ji bo li şûna wan bir’yaran ji bo wana bigire? Wê demê, hêzên ku xwe k’urdistanî-giştî dihejmêrin, çima ew bi devê wan hov û harên DAÎŞ-ê va berdan?  Wê bi wî awahî wan bip’arêzin? Na! Şengalî û hemû êzdîyên Başûrê K’urdistanê dive ne ku xweserîya xwe di herêmê da hebin, lê her weha cîhê xwe di r’êvebirîya navendî ya Herêmê da (parlamênto, hûkumet) bigirin, ji bo ku bibin  endamên wê civakê yên xwedî maf û bi xwe jî beşdarî çareserkirina pirsgirêkên xwe bibin, ne ku li r’ex hukumetê berpirsekî êzdîyan hebe, yê ku ji bilî nav t’u erk û hêza çareserîyê di dest wî da nînbe… Ma k’urdeyetî wisa dibe?

Lê wek ku tê xuyanê, ev daxweza mafdar bi dilê hinekên li der û hindur’ nine, ji bo  wê jî her tiştî dikin, ku yekîtîya net’ewî anegorî berjewendîyên xwe ava bikin, ango: “Hemû mafên we dê di dest min da bin, lê ezê ji bo we tiştekî nekim, dema ku hûn k’etin tengasîyê, ezê we wek berxa qurbanê bidim devê dijminên hov û har!” – Erê?

A, ji bo wê jî, wek ku bir’êz Mûrad Karayilan di daxwîyanîya xwe da dibêje: “…hin kes hene dixwazin fitneyê di navbrea hêzên Kurdistanî de derbixin … Hinek kesên kontra û bi istixbaratên dewletên dagirker re dixebitin, fitneyên weha belav dikin û armanca wan di navbera PKK û PDK de nakokiyan çê bikine û dixwazin weha nîşan bidin ku çi PKK û çi HDP ango siyaseta Bakûrê Kurdistanê di derheqê Şengalê de nêrîna wan cuda hene, dixwazin Şengalê ji Başûrê Kurdistanê cuda bikin, ew kes bi qestî dixwazin tiştekî wisa belav bikin. Ya rastî jî ne wisaye”.

Gelo ev k’arê r’eş ê “RUDAW” wê r’ojekê r’aweste? Ez dibêjim – na! Heya sparîşdarên wê yên derva hebin, ewê vî k’arê xwe bidomîne. T’enê dimîne, ku r’ayedar û siyasetmederên me dûrdîtî bin, guh nedin wê...

Gelê k’urd îro pêdivîya xwe bi Yekîtîyê heye. T’enê bi Yekîtîya Net’ewî, emê di vê  cîhana hov û haran da bikaribin xwe wek net’ew li ser p’êyan xwebikin!