Bi pêşengiya Komeleya Wêjekarên Kurd, li Amedê bernameyeke wêjeyî hat lidarxistin
Amîda Kurd / AMED
Bi pêşengiya Komeleya Wêjekarên Kurd, li Amedê bernameyeke wêjeyî hat lidarxistin.
Bername bi tevlîbûna gelek sazî, komele, nivîskar û wêjevanên kurd li Dîclekenta Amedê li cafeyekî hat çêkirin.
Di bernamê da xala derkete pêş, yekîtî û hevgirineke xurt a dildarên zimanê kurdî bû.
Di civînê da hevserokên Komeleya Wêjekarên Kurd Siltan Yaray û Mihemed Devîren mafê axaftinê girtin û balê kişandin ser yekîtiya nivîskaran. Hevserokan gotin; bi yekîtiya nivîskarên kurd ew ê hêza xwe xurttir bikin û ew ê bi zimanê kurdî dengê xwe bêtir gur derxînin. Hege ev yekîtî di navbera nivîskar û dildarên zimanê kurdî da çênebe, ew ê di pêşerojê da bibe sebebê gelek nexweşiyên bê derman.
Piştî axaftina hevserokan, gelek nivîskar û beşdarên bernameyê jî mafê axaftinê girtin û balê kişandin ser tifaqa navbera sazî û komeleyan.
Sazî û komeleyên weke; Komeleya Nivîskarên Mezopotamyayê, PENA Kurd, Med Der, Enstîtuya Kurdî ya Amedê, Komeleya Ziman û Çandê ya Birca Belek a Cizîrê, ARÎ-DER a Batmanê, Komeleya 78'an, Platforma Zimanê Kurdî, Tora Ziman û çend nûnerên weşanxaneyan tevlî civînê bûn.
Bername bi kêşandina dîmenekê nîşaneya yekîtiyê bi dawî bû.