PJAK: Pêşxistina yekitiya demokratîk riya tekane ye

Partiya Jiyana Azad a Kurdistanê (PJAK), ji bo 28'emîn salvegera bûyerên 9'ê Kewçêrê û rûdanên dawî yên li herêmê daxuyaniyeke nivîskî weşand û ragihand ku eniya pêşeng a têkoşîna Kurd û yekitiya demokratîk a her çar parçeyên Kurdistanê, misogeriya aştî û azadiyê ye.

Li gor Hawar Newsê weşandiye, PJAK'ê di daxuyaniya xwe de destnîşan kir ku li Rojhilata Navîn şerekî sîstematîk li ser gelan hatiye ferzkirin û got: "Îro careke din ji ber helwestên dij-demokratîk ên hêzên serdest ên cîhanî û herêmî, li şûna pêşxistina aştî û azadiyê ji bo civakan, şerekî wêranker tê meşandin. Riya bidawîanîna vê tarîyê, pêvajoya aştiyê, civaka demokratîk û azadiya gelê Kurd e."

PJAK'ê li ser pêşhatên nû yên li Rojhilatê Kurdistanê û Îranê de diyar kir ku desthilatdariya Tehranê li ber du riyên sereke rawestiyaye: yan berdewamkirina şer û qeyranan yan jî vebûna li ber aştiya civakî û naskirina mafên rewa yên gelê Kurd û neteweyên din. Daxuyanî balê dikişîne ser wê yekê ku bêyî çareserkirina pirsgirêka Kurd li Îran, Turkî, Îraq û Sûriyê, asayîş û aramiya mayînde li Rojhilata Navîn pêk nayê.

Di daxuyaniyê de her wiha bangek ji bo xelkê Rojhilatê Kurdistanê û tevahiya hêzên demokratîk hat kirin ku li hember zextên navxweyî, girtin û darvekirinan têkoşîna xwe ya hevbeş xurtir bikin. Hat gotin ku rizgarkirina gelan ji qirkirina çandî û fîzîkî tenê bi riya projeyeke neteweyî û demokratîk a yekgirtî mimkun e.

PJAK di dawiya peyama xwe de baweriya xwe anî ziman ku hewldanên ji bo diyalog û çareseriya siyasî dê bi ser bikevin û têkoşîna azadiyê ya gelê Kurd dê hemû civakên bindest ber bi aramî û jiyaneke azad ve bibe.

Wêne: Amîda Kurd / Sembolîk