Jinên Kurd ên li Ewropayê daketin qadan

Li bajarê Frankfûrt ê Elmanyayê, li paytexta Fransa Parîsê û li bajarê Îtalya Torînoyê bi pêşengiya tevgera jinên Kurd meş hatin kirin û mîlîtarîzm û êrîşên dagirkeriyê yên dewleta Tirk hatin şermezarkirin.

PARÎS

Li paytexta Fransa Parîsê, Kurd û tevgerên şoreşger-komunîst ên Tirkiyeyî li dijî dagirkerî, mîlîtarîzm û şer meşiyan. Bi banga Tevgera Jinên Kurd a Fransayê (TJK-F) û Yekîtiya Jinên Sosyalîst (SKB), pêkhateyên Platforma Demokrasiyê ya Parîsê tevlî meşê bûn. Meşê ji meydana Repûblîqûe dest pê kir û heta meydana Bastîlle dewam kir.

Tevî pankart û flamayên Tevgera Jinên Kurd a Ewropayê (TJK-E), flamayên TJK-F, KSB û pêkhateyên Platforma Demokrasiyê ya Parîsê hatin hildan. Di meşê de polîtîkayên dijminatiya li jinê û qeyûm ên rejîma AKP-MHP'ê hatin şermezarkirin.

Jinan pankartên li dijî dagirkerî, mîlîtarîzm û şer hildan. Balkêş bû ku gelek jin û zarok tevlî meşê bûn.

Li meydana Bastîlleyê piştî deqeyeke rêzgirtinê bi navê SKB'ê Esra Asiye Guden axivî û belavoka Platforma Demokrasiyê ya Parîsê û peyama TJK-E'yê hatin xwendin. Çalakî bi qîrîna dirûşma "Jin, Jiyan, Azadî" bi dawî bû.

FRANKFÛRT

Li bajarê Frankfûrt ê Elmanyayê di çarçoveya kampanya "Ji bo guhertin û azadiyê tu jî rabe ser piyan" meş û mîtîngek pêk hat.

Meşê Şemiyê saet 14:30'î bi pêşengiya YJK û Jin ên Nû li ber gara trenê dest pê kir.

Di çalakiyê de desteserkirina şaredariyên Wan, Mêrdîn û Amedê yên HDP'î hate şermezarkirin. Meş li meydana Romerê bi mîtîngekê bi dawî bû.

TORÎNO

Li bajarê Torîno yê îtalyayê, dagirkerî, bomberdûman û darbeya qeyûm a dewleta Tirk hatin şermezarkirin.

Çalakiyê li meydana Pîazza Castello dest pê kir û Kurd tevî dostên xwe tevlî bûn.

Di çalakiyê de dewleta Îtalyayê ji ber firotina çekan a ji bo Tirkiyeyê hate şermezarkirin, her wiha hate xwestin ku ambargoya li wargeha penaberan a Mexmûrê tê ferzkirin bi dawî bibe.